الدكتور الصيدلي وظيفته الأساسية هو أنو يشرف على حالات المرضى ويتأكد انهم بوخدوا الدوا المناسب لحالتهم بالجرعات المناسبة، وجنبا لجنب مع الدكتور بقرروا شو العلاج الأمثل للحالات المرضية المختلفة، اذاً بنعرف من هون انو الدكتور صيدلي شغله بيكون بالمستشفى و طبعا الو الصلاحية انو يشتغل بالصيدليات ومصانع الأدوية و أي من المراكز الصحية العامة والمتخصصة ( مجال عمله أوسع من الصيدلي).  عدد ساعات التخصص في جامعتنا: 208 ساعات موزعين على 6 سنين.

 أول سنتين بتكون المواد تقريبا عامة مشتركة مع تخصصات الأحياء والكيمياء و ما بنكون لسا داخلين في جو التخصص ، السنة الثالثة بتكون نقطة تحول كبيرة عن السنتين اللي راحوا بنبلش ندرس فيها عن أسماء الأدوية و استخدامتها وتفاعلاتها وبندرس عن الأمراض و علاجاتهم و في هاي السنة بكون في حفل الترسيم اللي بأدوا فيه الطلاب القسم قبل ما يبلشوا يتدربوا بصيدليات المجتمع عالصيف، وتقريبا سنة رابعة وخامسة بنكمل ع نفس النمط.

في سنة سادسة بكون فيها التدريب السريري في المستشفيات وهون الاختلاف الحقيقي عن الصيدلة العادية.

بلش التخصص شوي شوي يوخذ حيز التنفيذ وتم بالفعل توظيف عدد قليل من الخريجين في المستشفيات بس لسا الوضع بدو شغل اكتر و مجهود وتكاتف من الكل لحتى يتم اقراره رسميا.

وطبعا هالتخصص مهم جدا لأنو بنضمن انو المريض اخذ احسن علاج بأفضل النتائج و بقلل من الوقت والجهد والمصاريف اللي بنتجوا عن الأخطاء في وصف الأدوية والأعراض الجانبية الخطيرة.